Општина Охрид со писмено соопштение возврати на обвинувањата што кон неа беа упатени на денеска одржаната прес конференција на ВМРО ДПМНЕ.
Во него стои дека испаничени од најавените смени, во локалното раководство на ВМРО- ДПМНЕ наместо да си ги анализираат своите постапки, продолжуваат неаргументирано да ја напаѓаат работата на Локалната самоуправа и градоначалникот Александар Петрески. Со тоа, стои во реакцијата, сакаат да ја замајуваат јавноста и одговорноста за нивните грешки и неуспеси, да ја префрлат на други и да се спасат од внатрепартиската чистка.
-Разжестени, како да се во предизборна кампања, со недолична и приземна политичка реторика, без аргументи, тврдат дека Локалната самоуправа и градоначалникот Петрески потрошиле 50 милиони евра, а не изградиле ништо. Јавноста треба да знае дека овие средства исклучиво се потрошени за инфраструктурни објекти во Општина Охрид, а не за огради за мостови , скапи липи и споменици, како што прават нивните каадри. Ако не се уплашени, јавно нека побараат отчет каде се трошат стотиците милиони евра кои Владата на чело со ВМРО- ДПМНЕ редовно ги обезбедува со заложување и задолжување на државата. Во ОК на ВМРО- ДПМНЕ треба да знаат дека тие долгови се огромни и дека треба да ги враќаат идните поколенија. Ги потсетуваме челниците на ОК на ВМРО- ДПМНЕ дека неколку стотици оштетени вработени во ЕМО, деновиве очекуваат одговор, зошто не им се исплатени ветените заостанати дваесетина плати и кој е одговорен за поигрувањето со нивните животни судбини, стои во реакцијата Локалната самоуправа.
OhridNews
