Општина Центар и КК Работнички потпишаа Договор со кој нашиот најтрофеен кошаркарски клуб ќе добие донација во висина од 1,5 милиони денари од Општината на чија територија се наоѓа, а кои ќе му бидат исплаќани месечно, односно по 125.000 денари секој месец.

„Сите 23 советници едногласно донесоа одлука дека Општината треба финансиски да го помогне нашиот најголем и најтрофеен кошаркарски клуб, посебно во оваа фаза кога тимот нема доволно средства, со што ќе се помогне тој да се стабилизира и да се врати на старите патеки“- истакна градоначалникот на Општина Центар, Владимир Тодоровиќ при потпишување на договорот.

Тој истовремено упати повик и до градоначалниците од другите општини да ги помагаат тимовите од своите територии, вклучувајќи го и Градот Скопје, за да не се дозволи во овие кризни времиња тие да згаснат.

Заблагодарувајќи се на донацијата, претседателот на „Работнички“, Златко Тодоров рече дека помошта доаѓа во вистинско време бидејќи клубот почна да се враќа на старите патеки.

„Овие средства се добредојдени да се подобри финансиската кондиција на клубот, а како гест значат дека се цени спортот, но истовремено е и поттик да се постигнуваат уште подобри резултати“, рече Тодоров. Тој истовремено го потенцираше и фактот дека „Работнички“ е тим кој не само што има прв тим, туку и кошаркарска школа од која веројатно во иднина, како и порано, ќе се појават нови кошарски асови.

На кошаркарските дресови на „Работнички“, покрај симболите на актуелните спонзори, ќе биде и грбот на Општина Центар со птицата феникс, така што кошаркарите истовремено ќе го промовираат и симболот на општината кој е малку познат во јавноста.

“извор Макфакс“
Ohridnews