Доколку продолжи трендот на поскапување на услугите, не е исклучено општина Охрид да изврши нагорна корекција на цената на водата за пиење. Ваква можност навести градоначалникот Александар Петрески, според кого, непроменетата цена на водата подолг период е една од причините за финансиските проблеми на МЈП „Проаква“.
– Водата во Охрид не е покачена 5-6 години. Тогаш бензинот беше 30 денари сега е 80 денари. Потребно е да се покачи цената на водата како што растат цените на другите услуги, но ако тоа се направи ќе делува негативно на стандардот на граѓаните за што ние водиме сметка, но правејќи баланс се загрозува работењето на јавните претпријатија, вели Петрески.
Градоначалникот укажува дека некогаш охриѓани пиеја најскапа вода во државата, а сега според цената на водата градот е некаде на средина во државата, бидејќи голем број општини ја покспиле водата. Но, доколку продолжат негативните економски трендови не се исклучува скорешна корекција на цената на водата и во Охрид.
– Нема да донесеме одлука наеднаш да се покачи цената на водата, меѓутоа какви се условите во државата и навестувањата за ново поскапување на електричната енергија сигурно дека и ние ќе треба да размислиме за тоа, изјави Петрески.
