Со цел да се поттикне рамномерниот културен развој, афирмацијата на културните вредности и анимирање на културата на локално ниво и да се обезбедат услови за достапност на граѓаните до културните вредности и нивно користење, Министерството за култура деновиве го објави конкурсот за манифестацијата „Топол културен бран“ за 2016 година. На овој конкурс свои апликации можат да достават сите општини во Република Македонија.
Според планираното, оваа манифестација ќе се реализира во две етапи: првата во месец јули и втората во месец август, преку заедничко финансирање од страна на Министерството за култура и локалните самоуправи.
На конкурсот, општините треба да достават прецизна и сеопфатна програма со проекти од сите области на културата: филм, театар, музика, танц, литература и ликовна уметност. Програмскиот концепт може да содржи самостојни и групни ликовни изложби, концерти од сите музички форми и жанрови (солистички, камерни, симфониски, популарни, етно, џез, концерти на фолклорни и хорски ансамбли и слично), изведби на класичен и современ танц, филмски проекции, драмски претстави, проекти наменети за најмладата популација, поетски читања и друго.
Конкурсниот рок трае заклучно со 27-ми мај 2016 година.
OhridNews
