Измина лето со многу работа, но за среќа без ниту еден фатален исход, вели претседателот на општинскиот Црвен крст, Сашо Точков, сублимирајќи ги резултатите од бројните активности во текот на сезоната преземени од страна на медицинските тимови, спасителите на вода и спасителите на планина и непристапни терени.
Спасителите на вода ова лето извршиле 23 интервенции на извлекување на давеници од вода и над 350 интервенции на укажување на прва помош. Најголем број од нив на плажата во Свети Наум. Имало случаи на укажување на помош и на непливачи кои се возеле на педалинки, но и на капачи кои не ги почитувале дадените препораки на спасителите на вода, но и со здравствени проблеми.
За жал и годинава дел од концесионерите не обезбедија услови за безбедно користење на плажите и пливалиштата.
– И покрај нашите сугестии и укажувања до нив и до охридската Капетанија на пристаништа не успеавме да обезбедиме безбедни плажи на целото крајбрежје. На шест од нив недостасуваа реквизити за безбедно користење на капалиштата, но затоа не недостасуваа лежалки и оние реквизити кои се второстепени по значење насекаде во светот, потенцира Точков.
Спасителите на планина кои го обезбедуваа европскиот натпревар по прецизно слетување со параглајдери имале три посериозни интервенции и преку десет интервенции на укажување прва помош на самите учесници. Била извршена и една интервенција врз слободен летач со параглајдер.
Од општинскиот Црвен крст велат дека и во идниот период ќе продолжат со надоградување на капацитетите и усовршување на новите вештини и техники, се со цел што поуспешно извршување на активностите.
