Рано е да се прогласи Договорот од Пржино за мртов, Македонија не може да ги реши проблемите без европско медијаторство, но европските претставници се соочуваат со закани. Ова се главните поенти од обраќањето на евроамбасадорот Аиво Орав на Седницата на собраниската комисија за европски прашања и националниот совет за евроинтеграции.
Според него, се покажало дека не е возможно Македонија да ги реши сама проблемите без европско медијаторство, но сега европските претставници, од Питер Ванхауте, еврокомесарот Јоханес Хан, европарламентарците, па до неговата делегација, се соочуваат со негативна кампања и закани.
„Ние сме тука за да ви помогнеме, бидејќи вие сте земја-кандидат, но сега веќе започна негативна кампања против посредниците на ЕУ и на самиот комeсар Хан, како и против неговиот експерт во Скопје, Ванхауте. Дури и заканите се зголемени до таа точка што сме принудени да ги зголемиме мерките за безбедност“, изјави Аиво Орав.
Американскиот амбасадор во Македонија, Џес Бејли ги повика сите партии и организации да учествуваат на изборите што ќе се одржат на 24-ти април.
Тој во писмена изјава наведува дека спроведувањето на договорот од Пржино е клучно за македонските евроинтеграции, кои САД ги поддржуваат. Бејли смета дека оставката на премиерот е важна пресвртница во тој процес, исто како и кредибилните избори.
„Ќе продолжиме да ја поддржуваме подготовката на избори, особено работата на Државната изборна комисија, како и реформите во медиумската сфера и на други места. Времето е кратко. Ги повикуваме сите партии и организации да учествуваат на изборите, тоа е најдобриот начин да се подобрат институциите и да се обезбеди кредибилен процес. САД ќе го набљудува напредокот на овој процес и ќе направиме наши проценки, како и ЕУ, ОБСЕ и други тела“, се наведува писмената изјава на амбасадорот Бејли.
OhridNews
Извор:„Макфакс“
