Осигурениците на ПИОМ во Струга меѓу првите ќе добијат “Портокалов плик”

Осигурениците на Фондот за пензиско и инвалидско осигурување од Струга се меѓу првите 30 илјади во Македонија кои неделава на домашна адреса ќе добијат писмено известување за состојбата на нивниот пензиски стаж. Имено, тие ќе добијат детални информации околу стажот за кој се платени придонеси и остварените плати, како и податоци за пензискиот стаж кој не е комплетиран, а за оние кои се на две години пред пензионирање и проценка за нивната старосна пензија.

Ваквите писмени известувања на домашна адреса се дел од проектот “Портокалов плик” на министерството за труд и социјална политика, чија цел е секој осигуреник предвреме да добие известување за податоците за пензиски стаж и плати. Како што информираат од министерството, на овој начин ќе се избегне појавата на осигурениците да им се плаќа осигурување на најмала основица и за помало работно време од оствареното, а ќе се има и целосен увид врз целокупното работење на Фондот и поголема контрола од страна на корисниците.

Првично известување освен осигурениците во Струга, ќе го добијат и во Кавадарци, Неготино, Валандово и Македонски Брод, а до крајот на 2012 година и останатите осигуреници на ПИОМ.