Резултатите кои вчера беа објавени од страна на студијата ТИМСС (Trends in International Mathematics and Science Study), опфатија 63 земји во светот. Според резултатите по математика, во земјава и светот има надолен тренд кон изучувањето на оваа дисциплина. „Македонија се наоѓа во среднопласираната група на земји, што е задоволувачки резултат. Од друга страна тоа остава простор за подобрување. Факт е дека немаме голема заинтересираност за изучување на овој предмет и негово полагање на државната матура“– изјави Министерот за образование и наука, Панче Кралев.
Со цел да се подобри начинот на изучување на овие науки, односно наставните планови и предавањата, треба да се спроведе одлуката за преведување на учебници од британските издавачки куќи. „Треба да развиеме конкретни мерки како да се подобрат резултатите во природните науки за следното тестирање на ТИМСС. Наставните програми од земја до земја имаат свои специфики, но овој вид тестирања ни овозможуваат да поставиме цел“ – додаде Кралев.
Инаку, тестот е конципиран во два дела – еден за математика, а другиот е комбинација за четирите природни науки. Следното тестирање на ТИМСС ќе биде во 2015-та година, а во тек е подготовката на националниот извештај, преку кој ќе се видат постигнувањата на учениците.
