– Се гушиме во прашина и кал, оневозможено ни е и непречено извршување на секојденвните работни обврски, бидејќи отежнато е и движењето на камиони. Вака е веќе шест месеци и како што изгледа за скоро состојбата нема да се промени, велат дел од жителите на село Горно Лакочереј.
Како што информираат од Секторот за комунален фонд и сообраќај, активностите на патот кон Долно и Горно Лакочереј, освен во зимскиот период кога поради ниските температури биле привремено стопирани, течат според предвидената динамика.
– Првично од наша страна беше започнато поставување на фекалната канализација, по што од страна на месната заедница беше побарано да се изврши и поставување на нова водоводна линија. Барањето беше прифатено и по извршените процедури за избор на изведувач започнаа активности за поставување и на цевки од водоводната линија. Во меѓувреме, како општина аплициравме и за добивање на средства од Европската банка за обнова и развој за рехабилитација на овој патен правец, која ќе се врши преку министерството за транспорт и врски и Агенцијата за патишта, вели Емин Селман од Секторот за комунален фонд и сообраќај.
Како што информираат од секторот, поставувањето на фекалната и водоводната мрежа се очекува да заврши во месец октомври, по што ќе следуваат активностите за рехабилитација на патот и негово асфалтирање со нов слој асфалт.
