Третиот Меѓународен саем за туризам Охрид 2010, денеска свечено беше отворен во х. Парк. Оваа година саемот е со изменета концепција, а акцентот е ставен на промоција на домашната туристичка понуда пред странските туроператори. Во рамки на Саемот, ќе се одржи форум за туризам на кој домашните и странските туроператоти непосредно ќе разговараат за можностите за соработка. Учесниците на саемот на 19 јануари ќе присуствуваат на манифестациите по повод православниот празник Богојавление – Водици.


– Оваа година во Охрид имаме 25 туроператори од Израел, Турција, Бугарија, Србија, Албанија, Косово, Италија, Унгарија и Црна Гора. Тие се интересираат за субвенционирањето во туризмот, што како новина во Македонија започна да се применува од оваа година и сметам дека тоа ќе биде позитивен поттик во развојот на туризмот, истакна директорот на Агенцијата за развој на туризмот, Зоран Стрезоски.


Учесниците на саемот ги поздравија продеканот на Факултетот за туризам и угостителство Јован Стојаноски, претседателот на Советот на општина Охрид, Душко Јаковчески, пратеничката Лилјана Поповска, заменик министерот за економија Методиј Хаџи Васков, како и претставник од учесниците.


На саемот на триесетина штандови претставена е понудата на повеќе хотели, институции, агенции и општини, меѓу кои е и општина Охрид. Саемот завршува на 19 јануари.

Ohridnews
фото: Емилио