Со стиховите на песната „Крушево“ изрецитирани од светски познатиот актер Раде Шербеџија и музиката отсвирена од македонскиот музички виртуоз Влатко Стефановски, вчера на Гумење во Крушево беше отворена спомен-куќата на македонската музичка легенда Тоше Проески, пренесува „Макфакс“.
Спомен-куќата, која е во форма на крст, обезбедува еден хронолошки приказ на неговото детство, на тинејџерските години, на периодот кога Тоше го достигна врвот во својата уметничка кариера и истата е збогатена со 350 автентични експонати кои се сопственост на семејството Проески.
„Од овој ден Крушево, родниот град на Тоше, градот на неговиот духовен мир и творечки неспокој ќе биде мала ѕвезда на земјата која ќе ги собира енергиите кој ќе пулсираат во духот на сеќавањето на Тоше“, рече Андреј Николовски, извршен директор на Меѓународната фондација “Тоше Проески“.
Пред повеќе стотина граѓани, членовите на семејството Проески и дел од државно-политичкиот врв, беше порачано дека изградбата на спомен-куќата на најдобар начин ќе го зачува споменот за ликот и делото на Тоше Проески.
„Човековата смрт не е точка, туку само запирка во животот на еден човек. Човековата приказна продолжува понатаму сè до моментот кога ќе има некој кој ќе ја раскажува, а ретки се оние чија приказна останува вечно да се прераскажува. Таква е приказната на Тоше Проески“, рече премиерот Никола Груевски.
„Спомен куќата на Тоше Проески, која денеска ја отвараме за јавноста, е инвестиција во иднината на македонската култура и гест на признание, гест на благодарност од сите граѓани на Република Македонија“, рече министерот за култура Елизабета Канчевска – Милевска.
Во централниот дел од објектот се наоѓа молитвеник со сите верски предмети што ги поседуваше Тоше, како и неколку негови запишани размислувања или животни филозофии кои го водеа низ животот, а се поврзани со вербата, љубовта, семејството, пријателството. Во неа се наоѓа и неговото студио во кое музицираше и компонираше и дневната соба на Тоше од неговиот дом во Злокуќани. Ќе има и две восочни фигури на Тоше во природна големина.
Објектот содржи и кафетерија за посетителите, која е поврзана со горното ниво преку тераса и повеќе висински платформи од кои се протега панорама на градот Крушево и Македониумот, како и продавница за сувенири во која ќе се продаваат реплики од предметите на Тоше.
Еден од најефективните детали на Спомен-куќата е и илуминацијата со која ќе се нагласи визурата на објектот. Пејсажната архитектура на објектот е разубавена и со зелена градина и хортикултурно уредување на просторот.
Објектот се простира на површина од околу 870 метри квадратни и е дело на архитектите Дејан Секуловски и Дејан Спасеновски, во соработка со Илија Божиновски.
Во рамки на отворањето, спомен куќата беше осветена со верска процесија предводена од Архиепископот Охридски и Македонски, г.г. Стефан.
Спомен-куќата ќе е достапна за пошироката јавност од денес.
OhridNews
извор: „Макфакс“
