Корпорацијата Интел на свечена манифестација што се одржа вчера во хотелот „Холидеј Ин“ во Скопје, ги награди најкреативните наставници и училишта во Македонија во користењето технологија и иновации во наставата.

ОУ „Ванчо Николески“ од Лескоец ја однесе првата награда во Југозападниот регион за користење иновации во наставата. Седум наставнички од одделенска настава од ова училиште заедно со нивните ученици учествуваа на овој натпревар, интегрирајќи ги наставните содржини од одредени предмети со наставната технологија. Поради успешноста на изготвените содржини и примената на лап-топ компјутерите во наставата од I до III одделение, ОУ „Ванчо Николески“ доби златна плакета, ЛЦД прожектор и сертификати за сите наставници и ученици кои учествуваа на овој натпревар.


Наградите на претставници на училиштето им ги врачија  министерот за информатичко општество Иво Ивановски, државниот секретар во министерството за образование и наука Елизабета Тодороска и претставникот на корпорацијата Интел, Андреја Јауковиќ.


Во програмата, која почна во ноември 2010, учествуваа над 400 одделенски наставници и 137 основни училишта, а награди добија осум училишта од земјава. Покрај ОУ„ Ванчо Николески“ од Охрид,  признанија добија и основните училишта „Кирил и Методиј“ од Кочани, „Климент Охридски“ од Битола, „Рилиндија“ од Тетово, „Вера Јоциќ“ од Скопје, „Крсте Мисирков“ од Гевгелија и „Блаже Конески“ од Велес.

OhridNews