Зоната на паркирање со наплата во централното градско подрачје осетно е зголемена, а повисока е и цената на паркирање, која наместо досегашните 30, сега изнесува 50 денари за еден час.
Најзасегнати се жителите на улиците Партизанска, каде се укинати повеќе бесплатни зони, како и на Димитар Влахов, Кеј Маршал Тито и околу х. „Ривиера“, каде користењето на паркинг на коловозите сега се наплаќа.
Новиот режим на паркирање предизвика реакции кај граѓаните, кои не се задоволни со најновото решение на Локалната самоуправа. Оттаму пак тврдат дека новиот режим ќе овозможи подобар проток на сообраќај, но и повеќе паркинг места, како за комерцијална употреба, така и во слободни зони.
Како нова слободна зона во центарот на градот се посочува просторот помеѓу Економското училиште и ОУ „Григор Прличев“.
– Овој простор ќе се користи за бесплатно паркирање на возилата, со можност за отворање на пешачка патека по која секој кој ќе го паркира возилото на оваа локација ќе може директно да излезе на улицата Димитар Влахов, информираат од Секторот за сообраќај при локалната самоуправа.
Со паркинзите во Охрид стопанисува ЈП „Билјанини извори“, кое дел од нив неодамна издаде во подзакуп.
OhridNews
