Oвој период од годината е круцијален за одржувањето на животната средина, бидејќи аерозагадувањето е многу повисоко и веќе ја надминува границата на дозволената јаглеродна емисија, истакна претседателот Стево Пендаровски, на приемот на ученици од осум средни училишта од разни градови, што го одржа во рамки на кампањата за подобра животна средина „Не игнорирај! Реагирај!“.
Затоа очекувам здружени акции на релевантните институции, но и подадена рака од нашите граѓани кои освен што ќе преземат конкретни еколошки акции, ќе бидат и во улога на еколошка патрола или еколошки патроли и набљудувачи на загадувачите. Сите ние преку самокритичност и навремена и брза реакција треба да бидеме упорни во нашата заложба да имаме почиста и поздрава животна средина. рече претседателот Пендаровски на средбата со учениците.
„Не игнорирај, реагирај!“ е платформа која обединува експерти од различни области, граѓански активисти, екологисти, креатори на јавно мислење, невладини организации и граѓански иницијативи, медиуми и поединци со цел да се изложат проблемите со кои се соочуваме како заедница; да се насочат прашањата кон соодветните институции; и да се провоцираат решенија за подобра животна средина и квалитет на живее.
Кампањата, која во организација на Институтот за комуникациски студии започна во март, се фокусира на три клучни теми: одржливи градови, почиста околина и климатски промени, како и на постоечките ризици и последици од климатските промени во државата.
OhridNews
