Актуелниот градоначалник на Охрид и кандидат за трет мандат од Социјалдемократскиот сојуз, Александар Петрески, е убеден дека на претстојните локални избори ќе извојува уште една победа над ВМРО ДПМНЕ. Непосредно пред почетокот на митингот на неговата партија кој вечерва се одржува во Охрид изјави дека не го плашат пораките на премиерот Груевски дека ВМРО ДПМНЕ ќе победи на претстојните локални избори.
-Не знам за која општина мисли но за Охрид може само да сонува. И Германија тргна на Русија но ја изгуби и Германија, така да можам да му порачам на Груевски дека ќе ги изгуби и овие локални избори, но и централната власт, а и ВМРО ДПМНЕ, рече Петрески.
Убеден во триумф на Петрески во Охрид е и генералниот секретар на СДСМ Андреј Петров.
-Во контактите со луѓето преовладува единствено мислење дека нашиот кандидат за градоначалник на Охрид Александар Петрески со поддршката на СДСМ и на сите опозициски партии заедно ќе биде новиот градоначалник на Охрид, изјави Петров.
Во рамки на проектот „Работно лето“, раководството на СДСМ викендов престојува во Охрид и Дебрца, каде оствари средби со граѓани на повеќе населби и села.
