– До сега од министерството за култура немаат подигнато одобрение за градба, се прават без одобрение. Ако кажуваат дека градат со одобрение на министерството за транспорт и врски, тоа значи дека е заобиколена локалната самоуправа и дека градат без одобрение за што ќе одговараат. На сите им кажуваат не треба да се гради незаконски, а тие градат без дозвола. За тоа имаме поведено и судска постапка, вели градоначалникот Петрески.
Директорот на Управата за заштита на културното наследство, Паско Кузман, ваквите тврдења ги демантира и отфрла како целосно невистинити.
– Градоначалникот ја лаже јавноста. Одобрение за градба имаме добиено уште пред година и половина, согласно законот, од министерството за транспорт и врски. Апсурдно е да се помисли дека толку значаен проект би се започнал да се гради без соодветна документација. Срамота е градоначалникот да изнесува вакви лаги, вели Кузман кој воедно ги отфрла и тврдењата на градоначалникот дека проектот чини 43 милиони евра, потенцирајќи дека изградбата ќе ја чини државата околу 9 милиони евра.
Како што е предвидено, на Плаошник треба да се изградат 23 објекти, меѓу кои Богословски факултет, музеи, галерија на икони, споменик на Св. Климент, црковна резиденција, конаци и други објекти.
Изградбата на целокупниот проект на Плаошник, според првичните планови, предвидено е да заврши во 2014 година.
