– Не смееме да дозволиме насилството какво што беше демонстрирано на синоќешниот собир на граѓани од населбата „Видобишта“ да се повтори на другите средби. Речиси половина час инсистирав од салата да излезат оние граѓани кои не живеат во оваа урбана заедница , но безуспешно. Сите знаат кои се оние што го направија инцидентот , кошкањето и обидите за физички напад. Меѓу нив имаше членови на ВМРО- ДПМНЕ, па дури и блиски членови на семејствата на локални функционери на ВМРО- ДПМНЕ кои не живеат во „Видобишта“, вели Петрески.
Од општинската ВМРО ДПМНЕ пак му порачуваат на Петрески да престане да го користи и злоупотребува името на оваа партија за оправдување и преставување како жртва и за своето катастрофално раководење со Охрид.
– Како партија однапред укажавме дека не е потребно мешање на политиката во овие граѓански иницијативи и натаму ги поддржуваме граѓаните без разлика на партиските симпатии во борбата против скратените права и манипулациите на локалната власт . Вчеравечер на Петрески конечно му се случи отпор , му се случи народ , кој јасно покажа дека е доста од манипулациите , лагите и неспособноста на Петрески и неговите сопартијци. Петрески со одлуката за стопирање на процесот на формирање на Урбани заедници, денес, дефинитивно капитулираше пред сопствените граѓани, велат од ВМРО- ДПМНЕ.
Од СВР- Охрид информираат дека од нивна страна се превземаат мерки за целосно расчистување на овој настан, по што ќе бидат поднесени соодветни пријави.
