Писма: Зошто да е едноставно кога може да биде сложено

Како по правило, по долгиот период за да се среди една улица со тротоар и асфалт, а тоа подразбира целокупно спроведување на каква и да било мрежа (струја, канализација, вода, телефон и сл.) под земја, се случува некој да го расипе и така тешко остварливиот резултат за средување на хаосот низ градот. Така добро познато е дека инсталацијата на мрежите се спроведува не заедно туку поединечно, т.е. откако ќе се асфалтираат улиците, а не ретко тоа е пропратено со уште една работа, а тоа е дополнително инсталирање бандери. Поточно кабелските телевизии се одговорни за тој хаос со оглед на тоа што сите знаеме дека електричната, телефонската, водоводна и канализациона мрежа се конечно под земја. Целиот град е преплавен со бандери кои спроведуваат кабли за телевизија и интернет.

Конкретно улицата „Пере Тошев“ долго време се приготвува за асфалтирање, поставени се и тротоарите, што значи прашање на време е нејзина реализација…Кабелските оператори без повод и најава поставија бандери и спроведоа кабли до сите станови и куќи посебно без најава и одобрение, така што моментално местото наликува како жичарница во скијачки центар. Се тоа би било во ред доколку по асфалтирањето на улицата не им текне на истите да ја ископаат така тазе ново изградена и последиците да се ровови кои ке се полнат со вода и ќе станат огромни дупки. Дали некој одговара за овие работи?Дали постои некаков закон, некаков стандард?Никој не е заинтересиран…сепак пожелно би било да се види за што станува збор имајќи предвид дека сме во 21 век во 2011 година.