„Можам да кажам дека целодневниот состанок беше продуктивен, што ме прави оптимист за иднината. Паралелно со нашиот состанок, дипломати и експерти од двете земји работеа на дел од контроверзните аспекти на договорот, особено фокусирани на идниот однос меѓу двете држави, кадешто, исто така, е забележан напредок.“ – изјави медијаторот на ОН Метју Нимиц, по средбата со министрите за надворешни работи на Република Македонија и Грција, Никола Димитров и Никос Коѕијас.
Тој најави дека серијата состаноци ќе продолжи и во иднина.
„Трасиравме пат за работа и можам да кажам дека – без да откривам детали – ги адресиравме тешките прашања. Престојат уште тешки прашања за решавање, но според мое мислење, како ангажиран во процесот подолго време, постои позитивно чувство. Двајцата министри беа фокусирани врз долгорочните односи, стабилноста на регионот, важноста за добри билатерални односи и сите се надеваме дека можеме да продолжиме да работиме на позитивен начин. – додаде Нимиц.
Министерот за надворешни работи на Република Македонија, Никола Димитров, истакна дека во Виена се разговарало за сите отворени прашања, односно за целиот пакет.
„Можам да кажам дека направивме условен прогрес, условен напредок, бидејќи како одиме напред така доаѓаме и до тешките прашања и мислам дека и од нашата страна и од нивната страна имаме доста за размислување и за мерење. Работевме по логиката што е тоа што е најважно за Република Грција, што е тоа што е најважно за Република Македонија и дали можеме во компромисот кон којшто се движиме да ги покриеме двете работи. Меѓутоа, не зачудува што колку поотворено, поконкретно чекориме кон решение, така и тешкотиите излегуваат се’ повеќе на виделина.“ – истакна Димитров.
OhridNews
