Во одлична атмосфера македонската репрезентација го одработи последниот тренинг во пресрет на тест – мечот со Молдавија 15 ч во Мардан во турскиот туристички центар Анталија.

Повратник во македонскиот тим е капитенот и рекордерот по бројот на настапи (88) Гоце Седлоски. Тој очекува добра игра против Молдавија и пред се поволен резултат:

– Среќен сум што сум со националниот тим. Она што ме радува е што сите репрезентативци максимално сериозно ги сфаќаат овие подготовки и овој тест натпревар. Свесни сме дека направивме голем кикс на средбата со Исланд каде загубивме многу наивно и несреќно, што е уште една потврда дека во фудбалот не победува секогаш најдобриот и затоа се надевам дека можеме впечатокот да го поправиме против Холандија.

Македонија досега двапати одиграла против Молдавија. Двата натпревари завршија без победник. Првиот во Кишишев заврши 0-0, додека на “Градски“ ремизиравме играјќи 2-2. Стрелци на головите беа Шаќири и Крстев.



Горан Пандев е еден од нашите репрезентативци кои настапува без зимска пауза. Иако распоредот на натпревари за него е многу густ, сепак со нетрпение и голема желба за успех го очекува пријателскиот дуел со Молдавија:

– Колку и да играм успешно во дресот на Лацио, сепак моите мисли се врзани со успехот на нашиот национален тим во овој квалификациски циклус. Според се што прикажавме во дуелите со Шкотска, Холандија и Исланд заслуживме барем уште два до три бода. Но тоа е фудбалот. Она што ме охрабрува е што одигравме најмалку рамноправно со сите овие селекции. Шансите за освојување на второто место во групата се сеуште актуелни и на нас останува да се подготвиме што е можно подобро за следните пресметки , особено со Норвешка и Исланд.

Според најдобрите во тимот на Катанец тестот со Молдавија е добродојден, а тие се надеваат и на изненадување над фаворизираната Холандија во продолжението на квалификациите.

ohridnews