Почина Доста Димовска, директор на македонскиот културно-информативен центар во Софија, информираат од Министерството за надворешни работи.  Димовска на 18-ти март доживеа мозочен удар, по што во тешка здравствена состојба беше пренесена на лекување во болницата Токуда во Софија.

Таа беше позната поетеса и политичар. Родена е на 17-ти февруари 1954 во Скопје, а води потекло од селото Лазарополе. Дипломира филозофија на скопскиот универзитет „Св. Кирил и Методиј“.

Нејзината политичка кариера започнува во текот на 90-тите години на минатиот век. Во текот на 1991 година е избрана за заменик-претседател на ВМРО-ДПМНЕ на Конгресот на партијата во Прилеп. До 1994 година таа е пратеник од редовите на партијата. Во тој период таа е претседател на парламентарната комисија за меѓународни односи. Во текот на 1998 година Димовска е избрана за вицепремиер во кабинетот на Љубчо Георгиевски. Од 27 декември 1999 година до 13 мај 2001 е министер за внатрешни работи. Во 2002 година поднесува оставка од партиските функции од партиски причини.

На 25 февруари 2002 година е назначена за директор на Агенцијата за разузнавање. Оваа функција ја напушта 5 мај 2003 година. Од почетокот на 2007-ма ја извршуваше функцијата директор на Културно-информативниот центар на Македонија во Софија.

“Извор Макфакс“
Ohridnews