Транснационалниот организиран криминал е реална закана за владеењето на правото, слободниот економски развој и демократските процеси, и оттаму превенцијата и борбата против овој вид криминал е приоритет на Владата, на Министерството за внатрешни работи, но и на сите институции надлежни за спроведување на законот. Ова меѓу другото го истакна директорот на Бирото за јавна безбедност при МВР Митко Чавков, на отворањето на дводневната меѓународна конференција – “Превенција и сузбивање на транснационалниот организиран криминал во Југоисточна Европа – Конвергенција на теорија и практика“, која денеска започна во Охрид.
Чавков нагласи дека знаењата и искуствата кои ќе се разменат на оваа конференција ќе дадат нов поттик во зајакнувањето на меѓународната соработка како императив во разбирањето на природата на транснационалниот организиран криминал и зајакнување на националните и регионални капацитети за негово спречување и сузбивање.
На конференцијата што ја организаираат македонското МВР и Центарот за безбедност, развој и владеење на правото (ДЦАФ) во рамки на програмата за гранична безбедност, учествуваат полициски експерти и научни работници од областа на безбедноста од речиси сите земји на југоисточна Европа.
OhridNews
