Со новите измени на Законот за полиција кои беа изгласани деновиве, полициските службеници без налог издаден од истражен судија, ќе можат да влегуваат во домовите на граѓаните за да вршат претреси и да апсат осомничени лица. Целта е да се олесни работата на полицијата, за да се спречат евентуалните жртви при спроведувањето постапки.

Според Министерката за внатрешни работи, Гордана Јанкулоска, новиот закон е јасно прецизиран, а веќе неколку години се применува во Хрватска. Полициските службеници ќе можат да уапсат граѓанин без писмена наредба, само доколку се исполнети условите од Законот за кривична постапка. „На овој начин полицајците ќе можат уште подобро и поефикасно да работат. Со законот се дефинира кога полицискиот службеник може да ги примени неговите овластувања, со цел да не се прекршат човековите права. Доколку не може да се утврди идентитетот на лицето кое прави прекршок, тоа ќе биде уапсено. Во одредени случаи, ќе може да се вршат прегледи и претреси во станбените објекти, односно, домовите на лицата за кои постојат сомневања дека извршиле кривични дела“ – додава Јанкулоска

Новина е и тоа што, поголеми ингеренции ќе има првиот човек на Бирото за јавна безбедност (БЈБ) кој, наместо истражниот судија, отсега ќе може да издава наредби за прикриено полициско дејствување.  Исто така, со новите законски измени ќе може да се употреби детектор на лаги, само со претходна согласност од осомниченото лице.

OhridNews

.