Припадниците на полицијата во 2012 година ќе добијат нова опрема со цел да се подобрат условите за работа и нивната ефикасност, најави министерката за внатрешни работи Гордана Јанкуловска. Таа пред членовите на полицискиот синдикат, кој вчера заседаваше во Охрид, ги изнесе приоритетите за кој се предвидени средства во буџетот кој беше усвоен неодамна. Како што можеше да се чуе неофицијално, ќе бидат заменети и полициските „крајслери“, кои поради високата потрошувачка на гориво се покажале како крајно неекономични.
-Размислуваме идната година застарените средства пред се возниот парк да го обновиме, делови од униформата на кои рокот е изминат и практично да одговариме на барањата на нашите вработени што во континуитет ги добиваме, истакна Јанкуловска.
Претставниците на синдикатот се задоволни од дијалогот со министертвото, а меѓу приоритните прашања кои треба да се решат, според нив, останува имплементирањето на системот на кариера.
– Фокусот на вниманието во наредната година ќе ни биде насочен кон имплементирање на системот на кариера како еден од клучните системи за професионалното работење на нашите колеги и нормално актите кои следуваат во тој правец, рече Тихомир Климоски, од Македонскиот полициски синдикат.
Полицискиот синдикат очекува да продолжи позитивниот дијалог со МВР со цел реализирање на клучните цели во 2012 година.
