– Со оглед дека се работи за мал број неработни денови,најактуелни се дестинациите кои се со поаѓање од Охрид или Битола со автобуски превоз на база 2 или 3 ноќевања со појадок, како што се: Рим, Будимпешта- Виена,Истанбул, Солун- Лутраки- Паралиа- Воден, Метеори. Освен овие дестинации, актуелни се и аранжамните во кои е вклучено поаѓање со автобус од Скопје за Виена, Азурен брег, Прага, Венеција и Амстердам. Од новогодишните аранжамни со вклучен авиопревоз најинтересни се патувањата за Париз, Прага, Истанбул, Израел, а цените на аранжамните се движат од 6200 денари па нагоре, вели Тања Билко од ТА Вис Пој.
И покрај богатата понуда, засега интерес кај охриѓани за дочек на Новата година во некој од познатите центри нема. Не е пројавен интерес ниту од страна на странските гости за прослава на најлудата ноќ во Охрид. Од туристичките агенции коментираат дека интересот за новогодишните аранжамни од година во година е се послаб.
– Досега нема интерес ниту од странските гости, ниту пак од охриѓани. Дали е тоа поради економската состојба или пак едноставно на прославата на Нова година повеќе не се гледа како на некоја посебна ноќ, не знам. Очигледно е дека од година во година се поголем број граѓани се одлучуваат новогодишните празници да ги поминат во домашна атмосфера. Сепак сме оптимисти дека интересот ќе се зголеми по 10- ти декември, објаснува Марија Лазаревска Џинџеска од ТА Тина турс.
За привлекување на што поголем интерес, во пакет аранжамните кои се нудат се внесуваат нови дестинации кои се интересни и ексклузивни, зависно од тоа колкав дел од семејниот буџет граѓаните можат да си дозволат да издвојат за оваа намена.
– На 17 декември во Банско ќе биде отворена ски сезоната пропратена со свеченото отварање на новиот Пирин Голф хотел со 5 ѕвезди, во чии рамки се наоѓа најголемиот СПА центар во Бугарија. Цената на новогодишните пакети за во овој хотел е околу 184 евра на ден за двокреветна соба, вели Елида Битрак од ТА Елида турс.
Во понудата на туристичките агенции можат да се најдат и Белград, Мадрид, но и дестинациите како Израел или Дубаи. Како што велат од агенциите- понудата е богата и ја има за сечиј вкус.
