Државниот инспекторат за труд, денеска извршил контрола на 53 правни субјекти во врска со почитување на препораките за заштита од топлото време. Поради утврдена непосредна опасност по здравјето на вработените (високи температури и зголемено УВ зрачење) издадени биле 23 решенија за забрана на работа на отворен простор во периодот од 11:00 до 17:00 часот, соопшти Министерството за труд и социјална политика. Забраните се изречени согласно со чл.49, став 2 од Закон за безбедност и здравје при работа.
Надзорите продолжуваат и во наредниот период и доколку се утврди непочитување на забраните ќе следуваат и прекршочни пријави од трета категорија во висина од 5000-8000 евра за правниот субјект и 500-1000 евра за одговорното лице на правниот субјект.Исто така, за утврдени други недостатоци и непреземени мерки согласно со Законот и подзаконските акти, ќе се изрекуваат соодветни прекршочни пријави, информираат од Министерството за труд и социјална политика.
