Поради густата магла која ја зафати скопската котлина, а која предизвика намалена видливост, на Меѓународниот Аеродром Скопје, и денеска има откажани и пренасочени летови. Проблеми со маглата на Скопскиот аеродром имаше и вчера кога имаше 16 откажани и 11 пренасочени летови, соопшти ТАВ Македонија.
Утрово откажани беа летовите до Скопје од Истанбул, Измир, Венеција и Љубљана, како и повеќето полетувања.
Бидејќи временските услови се менуваат постојано, апелираме до сите патници да ги следат информациите и насоките за нивните летови кои ги добиваат од авиокомпанијата со која летаат.
За патниците и јавноста би сакале да појасниме дека Меѓународниот Аеродром Скопје не е затворен.
Аеродромот е постојано отворен, без разлика на временските прилики, а нашиот персонал е подготвен да ги прифати, услужи и испрати и авионите и патниците, соопшти ТАВ Македонија.
Дел од пренасочените летови од аеродромот во Скопје вчера беа прифатени од Охридскиот аеродром, каде засега нема проблеми со маглата која деновиве е надвисната над земјава.
На веб-страниците на на Меѓународниот Аеродром Скопје (https://skp.airports.com.mk/) и аеродромот „Св. Апостол Павле – Охрид, сите промени во редовниот распоред на летање се ажурираат во реално време, информира ТАВ Македонија.
Г.М.
Фото: Архива
