На аеродромот „ЏФК“ во Њујорк, со шест килограми хероин е уапсен еквадорскиот фудбалски судија, Бајрон Морено.

Морено во Њујорк допатувал со редовна линија од Еквадор, хероинот кој во десет пластични вреќички му бил врзан околу телото, му бил откриен при рутинска царинска контрола.

Бајрон Морено како судија стана познат по осминафиналниот меч на СП во 2002 година, кога со скандалозно судење во четвртфиналето ја турна Јужна Кореја, а Италија ја испрати дома. На тој натпревар, Морено на Италија и поништи два гола, а Франческо Тоти поради црвен картон пред време го заврши натпреварот.

По тој натпревар во Италија се повикуваше на линч, а дури имаше и закани за негова физичка ликвидација. На СП во 2002 година кое се одржа во Јапонија и Јужна Кореја, Морено го судеше и натпреварот САД-Португалија, кој заврши со резултат 3:2.

Една година по СП во 2002, Морено од Фудбалската федерација на Еквадор беше суспендиран на 20 натпревари, откако мечот помеѓу Барселона и ЛДУ Кито го продолжи за цели 11 минути.

Во судиското надополнување на времето ЛДУ Кито поразот од 2:3 го претвори во победа од 4:3. Веднаш по суспензијата Морено ја прекина судиската кариера.

Извор “Макфакс“
Ohridnews