Португалија во извондреден меч ја совлада Данска со 3-2 и остана во игра за пласман во нокаут фазата од Европскиот шампионат.
По само 25 минути игра имаа “европските бразилци“ убедлива предност од 2-0 со головите на Пепе и Постига. На истекот на првиот дел Бендтнер со првиот гол на мечот ги врати во игра Данците.
Португалците ја контролираа играта во вториот дел, а мечот надвор од дофат можеа да го стават по приликите на капитенот Роналдо. Но најскапиот фудбалер на планетата промаши две колосални прилики, кои и почетник би ги реализирал.
Казната за промашувањата стигна во 82 минута кога повторно Бендтнер со глава ја погоди целта изедначувајќи на 2-2. Португалците беа скоро надвор од турнирот, кога Бенто на местото на Нани го уфрли Варела, кој му возврати со погодок во 88 минута.
По овој триумф Португалија и Данска се изедначија на табелата со по три освоени бода. Во последната рунда, Португалија игра против Холандија, додека Данска игра со Германија.
М.П.
