Дали дигитализацијата на образовниот систем, помасовно ќе ги вметне електронските учебници во едукацијата на учениците, е прашање на време. Во дел од европските земји, заборавен е традиционалниот начин на предавање од книги, додека во Македонија постепено се воведуваат електронските учебници кои ја збогатуваат образовната програма. На денешната трибина во Скопје „Отворено образование за отворено општество“, д-р Алек Тарковски, член на Советот за информации при Министерството за администрација и дигитализација на Полска, даде свој осврт на овој проект.

Според Таркоски, наставниот кадар во Полска силно се потпира на печатените книги, а оваа идеја за разлика од Македонија, не е доволно прифатена. Со воведувањето на еден ваков  план, ќе се зголеми знаењето на учениците и студентите, а пристапноста до книгите ќе биде олеснeта.
 
„Овој план засега наиде на мал интерес во мојата земја. Неретко учебниците имаат висока цена, а концептот на Отворени образовни ресурси (ООР) како што се книгите во електронска верзија, ги опфаќа сите образовни методи. Тука се и наставните програми, учебниците, како и секаков друг материјал кој се употребува во наставата. Едноставно што ќе треба да го направат учениците и студентите, е да ја отпечатат електронската верзија на учебникот. Тоа не чини скоро ништо, додека комерцијалните учебници коштаат и по неколку илјади денари“ – додава Таркоски.

Инаку во земјава, од пред неколку години функционира проектот „Е-учебник“, а засега на интернет можат да се најдат електронските учебници за учениците од 3-то од 8-мо одделение.

OhridNews