Според неофицијалните податоци, две третини од охридските средношколци веќе имаат сексуални односи, а само една половина од нив користат презервативи, истакнуваат здравствените работници.
– Многу малку имаме официјални податоци за тоа што се случува со младите во Охрид, а тоа недостасува за да се превземат и конкретни мерки за превенција и нивна заштита, потенцираат тие.
Бројот на несакани бремености не се намалува со текот на годините, а тоа е доказ дека недостасува навремена едукација на младите. Единствено радува фактот што е намален бројот на сексуално преносливите болести, многу ретки се случаевите на заболени од гонореја или сифилис.
Ова се дел од заклучоците од средбата организирана од страна на Младинскиот совет Охрид и здравствените работници, како дел од активностите на годишната програма на советот, наменета за сексуалното и репродуктивно здравје кај младите. Во идниот период предвидени се бројни активности чија цел е поголема едукација и превенција.
