Студентскиот парламент при Универзитетот за информатички науки и технологии “Св. Апостол Павле” и Националната асоцијација на престижни академски граѓани денес потпишаа меморандум за соработка.
Како што беше потенцирано по потпишувањето на меморандумот, целта е во иднина преку низа одржани обуки, натпревари, да се искористи потенцијалот на најуспешните студенти.
– Ќе се организираат настани, обуки во соработка со студентскиот парламент каде ќе се обучуваат студентите за практичните вештини за креативност и претприемништво, затоа што креативните човечки ресурси се клучни за успех на една држава. Воедно, за да можат студентите и адекватно да одговорат на предизвиците на новото време. Ќе има свечено доделување на сертификати, натпревари во странски земји, а сето тоа ќе биде и значајно дополнување на нивната биографија, вели Д-р Виктор Ѓорѓиески, претседател на НАПАГ.
Задоволство од потпишувањето на меморандумот искажа и претседателот на студентскиот парламент при Универзитет за информатички науки и технологии “Св. Апостол Павле” кој истакна дека идната соработка ќе биде од особено значење за понатамошното доедуцирање и успех на студентите.
Националната асоцијација на престижни академски граѓани е формирана оваа година со цел да се искористи во целост потенцијалот на најуспешните студенти од сите професии преку развојот на креативноста и нивните претприемнички вештини. Во асоцијацијата може да членуваат сите студенти од прв, втор и трет циклус студии со просек повисок од 8.5 и најмалку комплетирана прва година од додипломските студии.
OhridNews
