Како што беше појаснато од страна на претседателот на МАСИТ Игор Бимбилоски, со двата потпишани меморандуми МАСИТ, како референтна комора од информатичко-телекомуникациската сфера, значајно ќе придонесе во развојот на македонската економија.
– Првиот договор ги обврзува МАСИТ и Агенцијата за странски инвестиции и промоција на извозот, на меѓусебна соработка во институционализација на извозот на софтвер од РМ. Истовремено сакаме да го поддржиме и развојот на соодветни кадри во РМ, и затоа го потпишуваме вториот меморандум, што треба да им даде шанса на македонските кадри да се едуцираат тука. Истовремено преку нашата бизнис-заедница да отвориме нови работни места за тие кадри во најголем дел да останат во Македонија и непосредно да придонесат во развојот на македонската економија, рече Бимбилоски.
Министерот за информатичко општество и јавна администрација Иво Ивановски изрази верување дека токму од Конферецнијата во Охрид ќе произлезат уште подобри идеи и легислативи, во насока на натамошен развој на информатичките и комуникациските технологии во Македонија, кои ќе придонесат за изградба на стопанство што ќе се темели врз знаење и високо-образован кадар.
Како што информира директорот на Агенцијата за електронски комуникации (АЕК) Роберт Орданоски, на Конференцијата на регулаторните тела од државите на ЈИЕ е прифатена иницијативата на Агенцијата, Македонија поточно Охрид, да стане центар на регулативата во областа за целиот регион.
