Пратениците Александар Николовски и Цветко Грозданов кои неодамна ја реафирмираа идејата за изградба на споменик на Свети Наум Охридски во центарот на Охрид упатија јавна благодарност до Советот на општина Охрид, што ја прифати иницијативата за подигнување на спомен обележје на Св. Наум. Во соопшетението на охридските пратеници понатаму стои:
„ Охрид и Република Македонија треба да изнајдат начин да се заблагодарат на големиот учител, основоположник на словенската и македонската писменост, големиот црковен деец и просветител Св.Наум Охридски Чудотворец. Затоа предложивме во Охрид да се изгради споменик на овој светител, чиешто име и животно дело се нераскинливо врзани со името на македонскиот град на светлината.
Така како што течеше неговиот животен пат, паралелно со животот на големиот деец и заштитник на Охрид Св. Климент Охридски, така и неговото спомен обележје треба да се најде во близина на споменикот на големиот Св.Климент. Како најсоодветно место за поставување на споменикот го предложивме Градскиот плоштад, односно просторот пред Рибниот Ресторан и сме благодрани што Советот на општина Охрид ја прифати оваа наша иницијатива.
На овој начин ќе се заокружи споменичниот комплекс кој што го сочинуваат, покрај Св. Климент Охридски, и учителите на Св. Климент и Св.Наум, големите солунски просветители Св. Кирил и Св. Методиј.
Овој споменик освен што ќе биде симбол на одбележувањето на историскиот великан, убедени сме дека ќе има и важност за натамошниот развој на туризмот во градот.
Исто така изразуваме голема благодарност на Министерството за култура коешто ја прифати нашата иницијатива и кое ќе биде главен носител на активностите за подигање на ова спомен обелжје. Благодарни сме што и покрај огромната финансиска криза Владата и Министерството за култура ќе изнајдат средства со кои ќе се реализира изградбата на спомен обележјето на Св. Наум Охридски.
Изразуваме огромна благопдарност и до невладините организации, интелектуалците и сите грѓани кои ја подржаа оваа идеја и се надеваме дека понатака заеднички ќе работиме во нејзина реализација. Медиумите од Охрид имаат несомнено значење во релизацијата на оваа идеја и без нив афирмацијата и реализацијата е невозможна. Затоа сме благодарни на досегашната соработка со надеж за уште поинтензивна соработка.
Спремни сме да го вложиме сиот наш професионален и личен потенцијал, кредибнилитет и авторитет во понатамошната реализација на оваа идеја и се надеваме дека достојно ќе ја одбележиме 1100 годишнината од упокојувањето на Св. Наум“, се вели во соопштението на пратениците Николовски и Грозданов.
