Прекршочни пријави за 20 навивачи на фудбалските клубови Тетекс и Шкендија, како и против двата фудбалски клубови, соопштува МВР. Пријавите следуваат по инцидентите што се случија на трети овој месец по натпреварот меѓу двата тетовски прволигаши.
Од 20-те навивачи, против кои ќе следуваат пријави, 18 се навивачи на „Шкендија“, а двајца на „Тетекс“. „Фудбалските клубови Тетекс и Шкендија се пријавуваат дека ги прекршиле одредбите на Законот за спречување на насилство и недостојно однесување на спортски натпревари“ се вели во соопштението на МВР.Нетрпението меѓу навивачките групи „балисти“ на Шкендија и „војводи“ на Тетекс беа присутни за време на самиот натпревар, но најголемите инциденти избија по натпреварот. Се фрлаа камења кон специјалците, а беа демолирани и неколку дуќани.
Инцидентот што се случи во Кичево, на полувремето на натпреварот меѓу Шкендија и Напредок,кога беше симнато македонското знаме, а беше поставено албанско, се уште не е целосно расчистен.МВР поднесе кривична пријава за еден тетовец кој се сомничи дека поставил знамиња на Албанија. Сè уште е непознат сторителот што го симнал државното знаме од јарболот на стадионот.
Полициската станица од Кичево поднесе и прекршочни пријави против 11 лица од кои пет се членови на навивачката група „Балисти“, а шест од навивачката група „Ѓаоли“.
Ohridnews
