Германската телевизиска станица АРД објави дека во таа земја од 2005 година досега биле наместени повеќе од 60 фудбалски меча. Анонимен сведок со потекло од поранешна Југославија призна дека заедно со Хрватот Анте Шапина учествувал во местењето мечеви.

Европскиот фудбал моментно го потресува најголемиот обложувачки скандал со наместени средби. Сведокот признал дека учествувал во местење на пет мечеви од Бундеслигата и голем број на средби од пониските лиги. Според изјавите, еден клуб од втората лига во 2007 година намерно ги загубил последните два меча и поради тоа испаднал.

– Тоа се случи пред крајот на сезоната. Клубот загуби шест бода и испадна од лигата. Интересно е што многу луѓе од клубовите и многу играчи беа заинтересирани за местење на мечевите. Во 80 отсто од случаите нашите манипулации беа успешни и го заработувавме тоа што сакавме да го добиеме – вели анонимниот сведок за АРД телевизијата, во емисијата „Факти“.