Со пригодна свеченост денес во селото Елшани, во присуство на претседателот на владата, Никола Груевски и градоначалникот Никола Бакрачески, беа пуштени во употреба реконструираниот пат Елшани- Елешец и новиот водоводен систем. Двата проекти се реализирани со средства од Светска банка.

– Реконструкцијата на патот беше едно од најчестите ваши барања сосема на место со оглед на тоа како изгледаше патот претходно, на кој не беше интервенирано повеќе од четири децении  и кој беше во очајна состојба. Ние како влада помогнавме да се обезбедат средства од Светска банка и после долго време со огромни напори на градоначалникот на Охрид и советниците,  патот успешно се направи, ветеното е реализирано, рече премиерот Груевски.

Како што истакна градоначалникот Никола Бакрачески, проектот за реконструкција на патот Елешец – Елшани  вреди 7. 610.240 денари, а вредноста на проектот  за новиот водоводен систем е  2. 200. 000 денари.

– Пред неполни два месеци бевме тука  за да  го означиме почетокот на   реконструкцијата на локалниот пат Елешец – Елшани  , а денес сме  повторно меѓу вас  и заедно  ја  споделиме радоста затоа што со поддршка на Владата по  речиси   педесет  години  успеавме да го реконструираме  овој пат     во  должина од  2  258 метри . Во ова охридско село  изградиме и  нов водоводен систем, со нов резервоар за вода со капацитет од 100 метри кубни и нова водоводна мрежа во должина од 2 200 метри . Со ваквите инфраструктурни зафати  битно допринесовме во градење на подобар  живот во  Елшани  и  создадовме сериозни услови за развој на руралниот туризам, рече градоначалникот Бакрачески.

Бакрачески потенцира дека периодов, Охрид е големо градилиште и дека на Охрид му се случува инвестициски бум.

– По долги години на стагнација и не реализирање на ниту еден проект,  иако наследивме општина со астрономски долгови и катастрофална финансиска состојба,   започнавме  да го градиме  Охрид.  Како никогаш  до сега се гради и инвестира, рече градоначалникот.

При тоа, градоначалникот потсети на бројните проекти чија реализација е во тек, меѓу кои реконструкцијата   на  улица „Питу Гули“, поставувањето на нова  атмосферска канализација  на улиците „ Сатеска“, „Трајче Трајчески“ и „Мича  Гилиќ“, изградбата  на кружен тек со две коловозни ленти   на   пресекот на  Булевар „Туристичка“ со улица „Бистрица“  и современата пешачка патека кон хотел Парк.  

Т. К.