Идејата за пренасочување на реката Грашница, која е меѓу најголемите загадувачи на Охридското Езеро, во реката Коселска – Далјан, ја подели стручната јавност.
Дел од неа смета дека оваа река треба да се пренасочи во Далјан каде би се изградила пречистителна станица. Оваа идеја како што пишуваше OhridNews во неколку наврати потекнува уште од минатиот век, а изготвен е и проект кој го поседуваат стручните служби на МЈП „Проаква“.
Пренасочувањето на долниот тек на Грашница, е предвидено уште со Генералниот урбанистички план – ГУП за Охрид од далечната 1973 година, а реализацијата на овој проект е предвидена и со ГУП од 2006 година. Според параметрите од планот изготвен во 1985 година, за дислокација на коритото на Грашница се потребни околу 6,5 милиони евра.
Оваа идеја има свои поддржувачи и денес. Агрономот Лазо Наумоски смета дека единствено решение да се запре загадувањето на Охридското Езеро со отпадни води кои ги носи Грашница, е пренасочување на реката.
– Проектот за пренаосчување на реката Грашница во реката Далјан е најприфатлив еколошки потфат за решавање на повеќегодишната голгота на самата река и неизвесност во развојот на езерскиот туризам на граѓаните од населбите Воска, Дрвара , Кошишта и дел од Стариот град, смета Наумоски. Според него со пренасочувањето на реката Грашница во Далјан и изградба на пречистителна станица на Коселска река ќе овозможи крајниот тек на водата од двете реки еколошки потполно чиста да се влива во водите на Охридското Езеро.
Ваквите тврдења според други експерти не држат. Противниците на идејата сметаат дека таа е апсурдна и не го решава проблемот со загадување.
– Никаде во светот реките не ги пренасочуваат, тоа не е вистинско решение, евентуално во тој случај загадувањето тогаш само ќе се се префрли од едно на друго место во езерото. Наједноставно и најпросто е да се стопира загадувањето, затоа што сите наши реки на изворите се чисти и имаат вода од прва класа, која е за пиење, додека после населбите доаѓа до загадување заради испуштање отпадни води во нив, што влијае на живиот свет во литоралниот дел на езерото, вели Ленче Локоска од Хидробиолошкиот институт.
Грашница минува низ населени места каде голем дел од објектите сеуште не се поврзани на канализационата мрежа и колекторскиот систем, а во неа, особено во минатото, се насочуваа и отпадни води од производствените погони што исто така придонесе за загадување на реката.
