Осумкратниот освојувач на Куп трофејот Вардар во финалето од 22-то издание ќе атакува на деветтата круна од второто по ранг натпреварување во Македонија. На патот до финалето „црвено црните“ го совладаа Тинекс Пролет, а за искачување на тронот мораат да го победат лутиот ривал Металург.
– Многу нијанси можат да го одлучат победникот во финалето од Купот. Мислам дека ќе решава одбраната додека во нападот многу добро се познаваме. Исто така на овие натпревари треба да се има и ден да му тргне на тимот, тогаш е се полесно – рече Немања Прибак.
Репрезентативецот на Македонија се осврна на дуелот и победата над Тинекс Пролет која им го трасираше патот во финалето.
– Им честитам на ракометарите на Тинекс Пролет кои одиграа доста солиден натпревар против нас. Многу е важно што победивме 11 погодоци разлика за дополнително подигнување на атмосферата во тимот – заврши средниот бек на Вардар.
Фото : Емилио
Мх.П.
