Oрганизаторот на летните олимписки игри коишто годинава ќе се одржат во Лондон, во средата го промовираа мотото на ова најголемо спортско натпреварување коешто ќе биде отворено на 27-ми јули, а тоа гласи „Инспирација за генерација“.

Претседателот на Меѓународниот олимпискиот комитет (МОК), Жак Рог изјави дека е убеден дека игрите во Лондон ќе „инспирираат цела една генерација“.

„Убеден сум дека Велика Британија ќе биде на висината на овој спортски настан и дека сите топло ќе ги дочека“, рече Рог, пренесува АФП.

„Очекувањата се големи и ние нема да ве разочараме“, вети претседателот на организациониот комитет (Локог) Себастијан Коу. Тој додаде дека Лондон е подготвен „да го прими светот ова лето“.

Во средата во Лондон се одржуваат повеќе манифестации, меѓу кои и свеченоста на отворено којашто ќе ги собере спортистите и уметниците од источниот дел на британската престолнина на Трафалгар Сквер.

Во соопштението објавено во средата, Локог инсистира на тоа дека тестирањата направени на 31 од 42-те олимписки локации минале со задоволителни резултати.

Покрај тоа, во средата во олимпискиот воден центар, се одржуваат и квалификациите за синхронизирано пливање на коешто учествуваат 160 пливачки од 34 земји.

На Олимпијадата којашто ќе трае од 27-ми јули до 12-ти август, ќе настапат 10.500 спортисти и околу 7.500 членови на технички екипи.

“макфакс“
Ohridnews