Врвни меѓународни инструктори ги пренесуваат светските искуства на македонските нуркачи на 10-от јубилеен „Скуба скул интернешнал“ (SSI) семинар што викендов се одржува во Охрид.
-Секоја година ги пренесуваме новитетите од светот на нуркањето, новитетите од подводната и хипербарична медицина, користење на софистицирана нуркачка опрема, употреба на мешавина на гасови и друго, истакна Милутин Секулоски, од Нуркачкиот центар „Амфора“ од Охрид и тренер на инструктори со највисока светска титула во областа на нуркањето.
Секулоски истакна дека бројот на нуркачи од година во година во Македонија расте, како и нивниот квалитет и едукација,а се поголем интерес има и меѓу турустите да „ѕирнат“ во подводните убавини на Охридското Езеро.
-Спорд најавите и резервираните аранжмани очекуваме доста туристи и оваа година да пројават интерес за нуркањето. Имаме современ нуркачки центар, еден од најдобрите во регионот и иако станува збор за континентална вода туристите има што да видат, пред се тука се подводните археолошки локалитети, како и други знаменитости, што го прават Охридското Езеро посебно, рече Секулоски.
Сергеј Валерјев од SSI од Ријека кој во Охрид спроведува инструкторска нуркачка обука, е фасциниран од проѕирноста на Охридското Езеро и смета дека тоа има што да им понуди на рекреативните нуркачи.
– Сум нуркал во многу езера во Европа, но не сум сретнал ваква проѕирност. Заедно со археолошката приказна и археолошките локалитети, со правилна искористеност на тие потенцијали сметам дека Охридското Езеро може да биде нуркачка атракција, изјави Валерјев.
Проѕирноста на Охридското Езеро ги фасцинира меѓународните нуркачки инструктори
На десетиот „Скуба скул интернешнал“ семинар во Охрид учествуваат педесетина нуркачи од трите нуркачки клубови од Македонија како и гости од Албанија и Хрватска.
OhridNews
