Неексплодирана рачна бомба и голема количина шприцеви, се пронајдени во импровизирано складиште на плажа во близина на населбата Воска. Местото случајно го откриле работници од охридската градежна фирма „Лоте“која била ангажирана да го уреди просторот каде наскоро треба да се изгради пешачка патека која ќе води до плажата Лабино.
– За среќа навреме ја забележавме бомбата меѓу купиштата отпад каде имаше сигурно и над 200 шприцеви, ни изјавија од компанијата. Оттаму за случајот веднаш ја информирале полицијата која изврши увид на лице место.
Бомбата и шприцевите, како и другиот медицински материјал е однесен на вештачење кое треба да помогне да се откријат лицата кои неуредената плажа ја користеле за нелегални дејства.
Жителите од населбата со кои разговаравме велат дека не е прв пат во околината да наоѓаат шприцеви, а во вечерните часови местото често го посетувале зависници од дрога, поради што мештаните плажата ја вика „нарко плажа“. Тука секојдневно играат децата од населбата и вистинска среќа е што тие не ја пронашле неексплодираната бомба.
Г. Момироски
