Кампањата “ Помислете и на нас”, што во рамки на одбележување на неделата на борба против гладта ја спроведе општинскиот Црвен крст завршува денеска. Кампањата има за цел да им се помогне на социјално најзагрозените граѓани, кои секојдневно се борат за да се прехранат.
Во изминатите денови беа спроведени повеќе активности, а собраните средства од акцијата ќе бидат употребени за набавка на храна која ќе им биде донирана на семејства од Охрид и Дебарца.
Во акцијата се вклучени граѓани, фирми како и неколку охридски ресторани, кои дел од неделната заработувачка ќе ја донираат за помош на социјално загрозените семејства. Акцијата ја поддржува и Лајонс клуб „Десарети“ чии членови донирале 28 прехранбени пакети.
На ниво на општина Охрид вкупно евидентирани се 850 социјално загрозени семејства. Нивниот број е поголем со оглед на тоа што има многу семејства кои ни се обраќаат, чии членови со месеци не зеле плата и буквално немаат што да јадат, а во Центарот за социјални грижи не се евидентирани како социјално загрозени семејства, велат од Црвениот крст.
