Бројот на корисници на опојни дроги во Охрид е значително поголем во однос на лани.
Охридската полиција регистрирала 383 лица нарко зависници, но реалната бројка е многу поголема од официјално регистрираните. Оваа бројка не се поклопува со корисниците згрижени во Дневниот Центар при Центарот за Социјални грижи .
-Во дневниот центар се згрижени 304 лица од кои што корисници на дроги се 177 а останатите се членови на семејствата односно родителите или сопруги на корисниците на дроги, вели психологот во институцијата Жанета Никовска- Стојковска.
Со корисниците на дроги згрижени во Дневниот Центар, во процесот на нивната рехабилитација работи стручен тим . Целта на сите активности е да се направат промени во личното, семејното и социјалното функционирање на корисниците на дроги.
– Ние мора да направиме позитивни промени во навиките и однесувањето на корисниците како и зголемување на периодот на апстиненција со што и би се намалил криминалитетот кај истите, истакнува Никовска -Стојковска
Дневниот Центар за корисниците на опојни дроги е лоциран во непосредна близина на Центарот за социјални грижи. “Така ќе биде и во иднина“, децидни од ресорното министерство. На прашањето дали се размислува овој дневен центар да се премести на друго ненаселено место со оглед на тоа што жителите на тој простор со петиции години наназад бараат негово преместување, од Министерството за труд и социјала со одговор дека “Проблемот со наркозависниците е реален проблем и сите треба да се соочиме со него за да го решиме, а не да бегаме од него“.
А. Белевска
