Над 2000 играорци од десетина земји ќе бидат дел од шестиот Меѓународен фестивал „Разиграно оро“ што ќе се одржува од 30-ти  јуни  до 4-ти јули 2012 година во Охрид. Според бројот на учесници оваа фолклорна манифестација од година во година прераснува во еден  од најмасовните собири на фолклористи на Балканот.

Фестивалот свечено ќе биде отворен на 1 јули на сцената во Античкиот театар, а концертите ќе се одржуваат на летната сцена на Градскиот плоштад.


Според првичните информации за сега осигурано е учеството на Фолклорните друштва ,,Абрашевиќ’’, ,,Рибарска Бања’’ и ,,Радост’’ од Србија, ,,Вангелов’’, ,,Луди млади’’ и ,,Петрич ‘’од Бугарија како и ,,Капија’’ и ,,Бисер’’ од Босна и Херцеговина. Исто така се очекува да настапат и играорци од Албанија, Турција, Грција, Косово, Хрватска, како и од други земји.

Покрај фолклорни друштва од странските земји, на фестивалот ќе настапат и македонски фолклорни друштва, но и друштва од дијаспората.

Фестивалот „Разиграно оро“ го организира ансамблот „Филиграни“ од Охрид со поддршка од Министерството за култура и од Општина Охрид.

OhridNews