Во рамки на програмата за комунален развој што ја реализира охридската локална самоуправа, во изминатиов период завршени се речиси сите проекти за изградба на канализациони мрежи. Овие инфраструктурни зафати кои започнаа во 2009 година се пуштени во употреба, или се во завршна фаза како што е случај со делови од селата Лескоец и Лакочереј.
-Системот за Пештани е целосно во функција, Болничкиот комплекс е завршен комплетно, на улицата “Сирма Војвода“ и делот под самата населба “Гоце Делчев“ исто така, во Велгошти проектот е реализиран 95%, во Подмоље канализацијата е пуштена во употреба, додека во Лескоец се уште се работи во делови од селото. За селото Лакочереј отпочната е постапката за реализирање на проектот, а една фаза е веќе завршена– изјави Зоран Шикалоски, раководител на Одделението за комунален развој и патишта.
Како што посочи Шикалоски, во делови од селата Лескоец и Лакочереј веќе се доградува канализациониот систем, со тоа што во Лескоец левиот дел од регионалниот пат и “Скребатска мала“ се комплетно ставени во функција. Делот кај Основното училиште и старо Лескоец веќе има изградено мрежа и во наредниот период ќе следи приклучивање на главната канализациона линија. На ова подрачје остануваат уште левата и десна страна на главниот пат од почетокот на Лескоец.
Изградбата на канализациони мрежи кои се приклучени на колекторот, е од исклучително значење, особено што со тоа се решава деценискиот проблем со фекалните води кои претходно се влеваа во септички јами.
