Охридските бели во петтата рунда од шампионатот ги прокнижија првите бодови откако на “Атина Бојаџи“ со пресврт 2-1 триумфираа над Врапчиште. Охриѓани го одбраа потешкиот пат до победа. Јусуфи на маестрален начин погоди за водство. Бакулески со прецизен удар израмна додека Речкоски го комплетираше пресвртот и донесе вредни три бода за трката во опстанок.

Почетокот на мечот им припадна на охриѓани кои имаа неколку добри удари од далечина. После воведниот грч гостите преку Алили се заканаа кон голот на Трајаноски. Теренеската иницијатива фудбалерите на Врапчиште ја капатализираа во 30-та минута. Јусуфи одлично прими топка на работ од шеснаесетникот, се намести на природната нога и пласираше во десниот горен агол.


Примениот погодок не ги поколеба избраниците на Мерко. Бакулески предничеше во нападите за изедначување. Токму овој фудбалер во 38-та минута донесе егал откако шутираше прецизно по додавање на Ф. Митрески.


Во вториот дел мечот потполно се отвори, а шансите се редеа пред двата гола. Први се заканаа охриѓани но ударот на Бакулески заврши покрај голот. Врапчиште најдобрата прилика за погодок ја имаше преку Идризи но Трајаноски беше на место.


Нововлезените Секуловски и Реџеп му дадоа друга димензија на играта Охрид. Нападите од страните беа се по опасни. Во 77-та минута по двојна комбинација на Речкоски и Секулоски, првиот изби сам пред Абази го сочека да падне и ја затресе мрежата.


До крајот на мечот “рибарите“ се затворија, и не им дозволија на гостите да се заканат за да сторат нешто повеќе. Во шестата рунда охриѓани на домашен терен го пречекуваат скопски Еуромилк.

Мх.П.