Вршителот на должност директор на јавното претпријатие „Охридски Комуналец“, Сашо Алче и официјално е нов член на Социјалдемократскиот сојуз на Македонија, дознава OhridNews. Тој и пристапил на партијата на 10 мај и за претстојните предвремени парламентарни избори се става на располагање на Општинскиот изборен штаб на СДСМ.

-Главна причина за моето пристапување кон СДСМ е што оваа власт и владејачка партија во континуитет го уништуваат Охрид. Како човек заљубен во Охрид, кој целиот свој животен и работен век го минал тука, сум згрозен од таа работа и време е да застанеме сите зад СДСМ и да помогнеме да се смени оваа ненародна власт.-изјави Сашо Алче.

Тој смета дека ВМРО ДПМНЕ во континуитет го потценува Охрид и затоа ќе ги загуби претстојните избори во Охрид, како што тоа се случи на последните локални избори.

Сашо Алче, инаку близок соработник на градоначалникот Александар Петрески, беше член на Социјалистичката партија на Македонија -СПМ. Во два мандати ја извршуваше функцијата потпретседател на младинската организација, а во еден мандат беше член на Извршниот одбор на партијата. Тој вели дека активностите во СПМ ги замрзнал пред 7 години, а во иднина својот политички ангажман ќе го насочи кон СДСМ.

–Веднаш по пристапувањето во СДСМ прифатив партиски обврски и ќе бидам дел од Општинскиот изборен штаб, како и во неколку локални штабови, додава Алче.

OhridNews