Македонскиот визуелен уметник Сашо Блажес учествува на изложбата на 53. Premio Suzzara во Италија со делото „Scorched Reflection (Synthetic Geology)“, создадено во 2026 година. Блажес е меѓу 76-те уметници избрани од жирито за годинашното издание.
Изложбата „Terra bruciata. L’arte nell’Antropocene“ („Изгорена земја. Уметноста во антропоценот“) беше отворена на 20 септември во Museo Galleria del Premio Suzzara, во присуство на уметникот. Ќе биде достапна за посетителите до 9 јануари 2027 година.
Годинашната тема го разгледува човечкото влијание врз животната средина и преобразбата на пејзажот. Во своето дело, Блажес ја разработува површината преку додавање и отстранување слоеви, задржувајќи видливи траги од процесот на работа. Оваа постапка е дел од неговото истражување на времето, меморијата и промените во материјалот.
Основан во 1948 година, Premio Suzzara има долгогодишна традиција на поврзување на уметноста со општествените прашања.
Сашо Блажес е роден во Охрид во 1980 година. Дипломирал и магистрирал на Универзитетот за уметности во Букурешт. Неговата практика опфаќа сликарство, инсталација и скулптура. Самостојно изложувал во Париз, Венеција, Грац, Букурешт, Берлин, Истамбул, Скопје и Охрид. Живее и работи во Охрид.
OhridNews
