Голем број од проектите кои Охридската локална самоуправа ги имала планирано за текот на 2013 година останале нереализирани, реагираше денска од Општинската организација на СДСМ од Охрид. Од таму потенцираа дека во програмата за Детска заштита, предвидените ставки што не биле реализирани во текот на минатата година, сега повторно се внесени  во програмата за 2014 година.

-Помпезно најавуваниот проект пред локалните избори – Работење на детската градинка во две смени – како да исчезна, како да го снема, но ние не го заборавивме, иако остана целосно нереализиран и надвор од развојната програма, велат од СДСМ. Од таму нагласуваат дека нереализирани останале проектите за доградба на Централната детска градинка, како и за промена на електричната инсталација, доградбата на санитарните чворови и замена на надворешната столарија,  во уште неколку други објекти на градинката

Од СДСМ реагираат дека од делот за Култура, во декември целосно биле избришани ставките за поддршка на естрадни уметници и за поддршка на Меѓународен семинар за македонски јазик, литература и култура. Исто така тие имаат забелешка и на нереализираните ставки од програмата за Образование кои се однесуваат на реконструкции, поправки, доградби и санации во неколку основни и средни училишта во Општина Охрид.

-Сите нереализирани ставки се префрлени во новата програма за образование 2014 година. Во отчетот градоначалникот само се напоменува дека се посветил на стабилизација на финансиските проблеми на училиштата, а не наведува дека тие се тековни финансиски  проблеми, за плаќање на сметки: струја, вода, комунални такси, неисплатени отпремнини по основ на тужби на пензионирани наставници, побарувања за неисплатени обврски за нафта за греење, и др., кои се покриваат со наменски блок-дотации, исплатени од буџетот на РМ, појаснуваат од СДСМ.

Тие истакнаа дека избришани ставки имало и во програмата за Социјална заштита, односно кај мерките за Бесплатни курсеви за учење на аглиски и германски јазик и Стипендирање на млади кои припаѓаат на социјално загрозени семејства.

–Посебно внимание посветуваме на отстранувањето на вторава ставка и нејзиното заменување со нова–за стипендирање на талентирани ученици и студенти. Ние за овој проект немаме забелешка, но децидно сме против начинот на формирање на комисијата за рангирање на пријавените и целосно се дистанцираме од објавената ранг-листа, бидејќи немеме увид кој се’ се пријавил и дали биле целосно испочитувани наведените критериуми од конкурсот, велат членовите на СДСМ од Охрид.

OhridNews